प्रासंगिक 3

विखे पाटील कॅम्पस मध्ये खऱ्या अर्थाने रुजली कॉलेज संस्कृती!

कोण ? कुठला ?कसा? यापेक्षा विखे पाटील कॅम्पसमध्ये म्हणजे पाटलांचा ! अशी एक वेगळी ओळख घेऊन या कॅम्पसमध्ये एका नव्या कॉलेज संस्कृतीने जन्म घेतला . जातपात, धर्म आणि उच्च निचतेच्या बेड्या फेकून देत इथल्या तरुणांनी एकत्र येत नवे आदर्श घालून दिले . फार्मसी ,इंजिनिअरिंग , मेडिकल तसेच अग्रीकल्चर असे अनेक अभ्यासक्रम इथे शिकतानाच मुले जीवन जगण्याची कला इथे शिकतात.

 या गणेशोत्सवात अत्यंत भक्तिभावाने मुलांनी गणरायाची प्रतिष्ठापना इथे केली आहे . मनात आलं तर लाथ मारील तिथे पाणी काढील अशा पिळदार मनगटांची एक फौज इथे सामाजिक कार्यासाठी सदैव तत्पर असते . लांबून आलेल्या मुलांचे प्रॉब्लेम सिनिअर मुले समजून घेतात . सुख दुःखात एकमेकांना घरच्यासारखा आधार देतात . एखाद्याच्या शिक्षणाला मदत करणे असो किंवा एखाद्याची शालेय फी देने असो इथला प्रत्येक जण मोकळ्या हाताने मदत करतो आणि यातूनच एक जिव्हाळ्याचे नाते या परिसरासोबत तयार होते .

इथे सुमारे 20 गणेश मंडळे असतील . एकमेकांच्या संमतीने रोज एका वेगळ्या ठिकाणी गोडधोड महाप्रसाद असतो . हॉस्टेलची मुले स्वतः वेळ देऊन व्यवस्थित नियोजन करतात . अगदी प्रेमाने एकमेकांना जेऊ घालतात . कुठलीही चिडचिड नाही ,त्रागा नाही . भांडणे फार क्वचित होतात  . कार्यक्रम मात्र भल्याभल्यांना नाही जमणार एवढे सुंदर होतात ! इथे यारी दोस्ती एवढी कट्टर आहे की घरची आठवण सुद्धा येत नाही !

वाढदिवस असतील तर मिळालेला गोड मार तर प्रत्येकाच्या आठवणींचा एक अविभाज्य भाग असेल . खचलेल्यांना लढायला आणि हरलेल्यांना जिंकायला शिकवणारी नवी विचारपद्धती इथे नांदते त्यामुळे इथे शिकणाऱ्या प्रत्येकाला या परिसराचा प्रचंड मोठा अभिमान असतो . विळद घाटासारख्या दुर्लक्षित भागाला इथे शिकणाऱ्या तरुणांनी त्यांच्या या कॉलेज संस्कृतीमुळे एक नवी ओळख दिली आहे .या संस्कृतीचा हिस्सा असलेल्या प्रत्येकाला मला लाख धन्यवाद द्यावे वाटतात .

दरवर्षी नवे विद्यार्थी येतात . थोडेसे घाबरलेले असतात पण लवकरच मोठ्या भावासारखे सिनिअर्स त्यांना समजून घेतात . शिकवतात . त्यांच्या दोस्तीमधून ही कॉलेज संस्कृती अधिकच वृद्धिंगत होत असते . इथे ढोल ताशांचा गजर आहे . टाळ चिपळ्यांचा जयजयकार आहे . दोस्तीच्या गोष्टी आहेत . प्रेमाचे मॅटर आहेत . विजयाचा जल्लोष आणि पराभवाचे अश्रू सुद्धा आहेत . तरुणाईचा धिंगाणा आणि वडीलधाऱ्यांचा सन्मान आहे . शिक्षकांचा आदर आहे आणि अभ्यासाचा व्यासंग आहे . संस्कृतीशी जवळीक असूनही आधुनिकतेचा साज आहे . इथे छत्रपती शिवरायांचे शौर्य आणि विवेकानंदांचे तेज आहे . तुकारामाची गाथा आणि आंबेडकरांचे संविधान देखील आहे ! इथे राष्ट्र निर्माणाची प्रेरणा आहे कारण इथे कॉलेज संस्कृती घट्ट रुजली आहे !!!

-अजिंक्य

Like me . Comment me. Follow me .